ادب وشعر | معنى يا حلوه بقلم حنا حزان ابو سنان

الثلاثاء 25.08.2026

معنى يا حلوه بقلم حنا حزان ابو سنان

2012-06-25 20:37:53

يا حلوة اللي غير قلبك ما هوا قلبي على الهجران صابر والنوى

ما عاد فيّه القلب يتحمّل عذاب حني خطي شوي عنقوده استوى

يا حامله هموم الدني لا تنحني بجنبك انا وحملك عليّ هوّني

مهما الضنا والغم عليكي تمرجلوا بصبوص عيني بقدمه ولا بعتني

روحي معي مشوارنمشي عالهدى ونقطف زرار الفل عا وقع النّدى

نرندح سوى بهاليل موّال الغرام من عجقة الموّال يرجعله صدى

ما عاد فيّ ظل ناطر للمسا ما ادري بغيري بتلتهي وعم بتنسى

يمكن ظنوني تكون من نسج الخيال لا تطولّي غيابك ولا تزيدي اسى

ذبلت زهور الدّار من بعد الغياب ما احلا الّلقا بعد الضّى وكثر العذاب

زاد الامل والعمر طافح عنفوان وما عاد بقى عندي تساؤل او عتاب

سبحان ربّ الصوّرك يا رجوتي فيكي انا هيمان وكبرت فرحتي

راح ظل صلّيلك ابانا والسّلام تا يحفظك الله الي يا منيتي

راح وصّل اشواقي مع طيور الفلا وما بخاف لو شاع الخبر وعالملا

انشالله تكوني سامعه دق القلوب وتومي بعينيك وقولك يا هلا

ما عاد بدّي من الدّني جاه وغنى وعزوه وحموله وطنطنه وسيف وقنا

اعطوني عيون مدبّله ومبسم حلو تا احتل عرش الحب لوحدي انا

المقالات المنشورة تعبر عن رأي كاتبها فقط، وموقع المدار بفسح المجال أمام الكاتب لطرح افكاره االتي كتبت بقلمه ويقدم للجميع مساحة حرة للتعبير