حاله عصيبه بهالوقت ما بتنحمل                        علقه علقها الشاب لمّا انه اكتمل

صارت الزيجه هم عا نفسيّته                           عايش بدوّامة فكر خوف ووجل

والبنت مشغوله بحسن الاختيار                        بدها عريسها يكون احلا من العسل

حامل شهاده مبروزه قد المقام                         دار وكوتدج وجنينه من ياسمين وفل

واللاند روفرجيب من اجمل طراز                  واقف بجنب الدار تيقولها  اجل !!!

شكله وسيم وطلعته مثل البدر                         بقولها بامرك بوعدك مش راح خل
وتمرق سنين الصبا من عمرها قوام                وهيّ تدوّر مع خيالها بلا ملل

تقرّب على الثلاثين من عمرها اكيد                وتنسى كانّه العمر واقف عا مهل

وتفيق من احلامها وبعده النّصيب                 ما عرف يستهدي عليها ولا امل

وتبدا الاماني تنهدم وشمسها تغيب                وسهم المطالب نازلي اوراقه وضل
ونفس الغلط ينعاد عا كلّ الشباب                 حامل كليبر وداير يمين وشمال

بدّه العروس تكون صوره من الصّور         حسن ودلال ولووك عالموضه وعال

هذه قصيره مش على قياسه يا ريت           وهذه طويله والتناسق بس مال

وشكل التعارف صار هوّ المشكله             بس عالموبايل ساعات الطوال

والثرثره وكثر الحكي ما له رصيد           وبعد نصّ الليل ويطول السجال

وبعده ما شافها ولا عرفها يا حرام          ساعات مع ساعات تفحيص وسؤال

مثل امتحان بسيخمتري مضطرب         هوّ وهيّ لا نتيجه ولا اعتدال   

وتخلص القصه بالتوافق يبنهم               انّه ما غدروا تفاهموا ولا في مجال

ويعود هالمواّل يرجع من جديد             مع قصه تانيه وشكل تاني وحال حال   

والويل كل ّالويل ان عرفوا الاهل         وقع الزّعل بيناتهم والانفعال

والشرط كل الشّرط ما يدّخلوا             حتّى الزواج يكون مضمون وحلال

وبرايهم كلّ الزّواج اللي حصل           بعهد المضىفاشل ومبني عالخيال

هيك العلاقه تكون يا امّا بلى !!!         والاهل اّخر من عرف بالاحتفال !!!

والاهل حيرانين زهقوا ما بقى           فيهم لا فرحه ولا اماني ولا منال

وبيضل خيط الامل ينده صاحبه       حتّى السعاده ينولها لو مهما طال

والام قلقانه على ابنهاالحبيب           تشوفه عريس وترقص بعزّ ودلال

والبي يفرح والاهل يفرح معه        وكل ّالجيران مع القرايب والهلال
 

بدنا الزّواج يكون الفه واحترام         وعطف ومحبّه مقدّسه وبلا زوال

ويعمر البيت بفرح كلّه انسجام        والحسب جنب النّسب هيك المثل قال

مبني على الايمان من ربّ الانام     مغلّف بروح الوفق مع راحة البال

ويسود التفاهم والتّعاون والسّلام       نقضّي العمر والبيت  يزهر بالعيال