الله وهبنا نعمته وخيره الوفير
اجمل طبيعه خصنا ومن دون جميل

من جملة الخيرات كلها فائده
شجرات هالزيتون ما الها مثيل

خضره ع طول السنه تتحدا الزمن
وراسخه بهالارض من جيل لجيل

وهي عمود البيت من زيتها الفقير
والغني يتهنوا ب هالثمر الاصيل

نملي الخوابي وهي بركه دايمه
نحفظها مونه وزيتها يشفي العليل

وانقلبت الايام وصاحب هالزتون
قلقان ليل نهار عا رزقه يا ويل

كانت الحصه مناصفه بينه وبين
الفراطين والحب عم بهيل هيل

واليوم صفّا الربع لاصحاب الارض
والباقي للي بيقطفه اكبر دليل

ما في عذر مقبول لاصحاب الزتون
شي موظف اودكتور او عامل معيل

عندك ثلاث رحلات عا طول السنه
وساعات تقضيها سدى وركوب خيل

والمثل قال اللي يبحضر عنزته
بتجيب توم ويحرسك الله الجميل

وموسم العز يفيض خيره عالبشر
والارض تنده لا مجيب ولا بديل

والكل يحسب للخساره والربح !!
بعمرك سمعت الارض تخسرلو قليل !!

شو يصير لو عطلت جمعه بهالسنه
لا راح يضيع العمر منك والسبيل

بالعكس راح تربح وتجمع موسمك
رتب امورك ما بقى في مستحيل

مهما سبحنا بهالدني واهوائها
ارضك وزيتونك لاولادك كفيل

الرزق ان سيبته بعلّم للحرام
والندم ما بينفع وراح يبقى القليل