انا فتاة عمري 20 سنة جامعية حبيت أعرض مشكلتي في هالزاوية لعل وعسى الاقي عندكن الحل صارت معاي مشكلة من حوالي تلات سنوات لكنها ما زالت مأثرة علي كتير بشكل مو طبيعي وماعم بقدر أخلص منها والمشكلة هي انو مرة من المرات وأنا راجعة من المدرسة عالبيت كنت أضطر انو أركب بمكرو باص لانو كانت المدرسة بعيدة عن بيتنا وكنت بهاليوم مريضة وتعبانة وكان لسه باقي نص ساعة لحتى أوصل عالبيت فغفيت عيني شوي وانا بالباص ولما صحيت شفت انو بقي بس راكب واحد بالباص فقلت خلص خليني انزل لانو مو حلوة اضلني قاعدة لحالي ولما نزل هالراكب اجيت انا قمت عشان انزل وراه والا بسرعة صاحب الباص مشي انا قلت يمكن ما انتبهلي وقلتلو لو سمحت وقف بدي انزل بس ما رد علي رحت لعندو وقلتلو وقف لكن عمل حالو مو سامعني وكان ماشي بسرعة مو طبيعية وقتها ما عرفت شو بدي اعمل صرخت عليه قلتلو وقف وهو ولا هون وكنت ميتة خوف ومو عارفة شو اعمل ووصل لمكان غريب اول مرة بشوفو وقتها ما لقيت قدامي غير اني أرمي حالي من الشباك غمضت عيوني وطلعت من الشباك وقتها ما بتذكر شو صار غير انو كانت الناس متجمعة وحسيت انو الدنيا عم بتدور حولي وغبت عن الوعي نقلوني عالمستشفى وصابتني كسور بجسمي كتير ودخلت بغيبوبة تلات ايام بس الآن الحمد لله شفيت تماما من كل شي حتى آثار الجروح العميقة راحت بس الجروح النفسية ما راحت ، صرت أشوف كوابيس كتير وما اقدر انام وصار عندي خوف من اي رجل اشوفو قدامي ما عاد اقدر أحس بالامان مع اي حدا ،تقدملي شاب يخطبني واهلي وافقو عليه بس انا رفضتو ما بعرف ليش اول ما شفتو تخيلت هداك السواق وخفت كتير لانو ما عم بيروح عن بالي والله تعبت نفسيا واذا شفت شاب مر من جنبي بحاول اني ابعد عنو كتير صارو الناس يقولو عنني معقدة بس انا مو هيك ياريت حدا يقدر يساعدني ... وبشكر كل شخص قرأ مشكلتي