انا فتاة من الشمال متصفحة دائمة للموقع وكتير عم بتشدني بالفترة الأخيرة المشاكل يلي بتنعرض وكيف انه الناس بجد محتارة وكل واحد الي فيه مكفيه
المهم ... حبيت أشارك بمشكلة بتواجه الكل وأنا متأكدة من هاد الشي، ولنوضح الأمور أكتر يا جماعة صلوا عالنبي
عليه أفضل الصلاة والسلام
يعني أنا ما بنعد مع الصغار وبنفس الوقت ما بنعد مع جيل الكبار، هات لنقول " جيل الشباب " ( على قولة المجتمع) وشو جيل شباب يا جماعة !! تحفة !! جيل شباب " مختير " من كتر الضيييييييييييييق والخننننننننننننق...يعني ما تقنعوني إنكم ما بتعرفوا ليش أنا عم قول هيك ..مش سامعة منيح شو السؤال : ليش !! شو السبب ؟؟...عجيب أمركو يا جماعة !! عميان ؟عميات ؟ اتطلعوا منيح حواليكو بتعرفو شو قصدي ، العالم مقلوب فوقاني تحتاني - هات لوضح : الأهل بيتذمروا من اولادهم وفش على لسانهم غير كلمة " شو هالجيل هاد ؟" - والولاد !! يا عيني عليهم ، قواميسهم التربوية ملياااااانة بالعبارات والكلمات الي بتدل على زود التربية " شو هالأهل ! دقة قديمة " ، " شو تتعلمي ! تجوزي يا هبلة قبل ما تبوري " ، " بصدقش إنك مش مصاحب " ، " بصدقش أنه في بنت مش مصاحبة شاب " ...كله بيركض ورا المظاهر والتفاهات
فففففففف يمكن قليلة صح ؟!! ...بحسب حالي اني متثقفة ومتعلمة وبحساب " عارفة من هالدنيا اشي " أتاريني كيف ما لفيت وكيف ما برمت وتعلمت وتعلمت ما راح أقدر أغيير النظرية الي بتقول البنت = اشي غلط
ها...الشباب كيفو ، بتلاقيهم اسا بكتبوا تعاقيب عالمشكلة من هب ودب عشان يأكدوا هالحكي ، يا حزركم ليش ؟؟ لأنه هني بيكيفو على هيك حكي لأنه بيعطي " الرجولة " عظمة وجبروت لا يوصف
يعني ليش هالتفكير ما بعرف، أنا وحدة من هالبنات الي كتير متضايقة وقصتي هيك: أنا عمري 29 سنة من عيلة كتير محترمة والحمد لله أهلي أروع من هيك ما في، ( بغض النظر عن الخناقات يلي بدي سميها عادية بتصير بين الأهل والأولاد بس المشكلة يلي بتخنق بس يكون الطرف التاني مع الأهل بنت كاتب عليها المجتمع لمجرد أنها بنت= اشي غلط ) ، أنا خلصت تعليمي ولساتني بدور على شغل ( وانشالله على هالهمة بلاقي شغل يمكن ها يمكن كمان شي 10 سنين ) ليش ؟ لأنه فش "واسطة " ..معهم حق بنفعش حدا حياله يتوظف ! بنفعش
المهم ، لنيجي للتفاصيل يلي القراء كلهم بيحبوها وبيستنوها، يا عمي حلوة والحمد لله، والسمعة بنحمد الله مسك ، شو الغلط الي عملته أنا بإني بعدني مش مخطوبة مش عارفة...عدوا معي يا جماعة : عماتي وخالاتي وصاحباتي وطبعا كناين الأقارب والجيران والذي منه كلهن كلهن فوق راسي " ليش بعدك مش مخطوبة !!؟ " شوفوا السؤال !! - يعني مجنون يحكي وعاقل يسمع ، يعني مين بهالدنيا ما بيحب يتزوج ويكمل نص دينه ، مين ما بحب أو بتحب تصير أم أو أب ؟
الناس مش عم تقتنع بالأشي الي بيقولوه أهل زمان " لو ركضت ركض الوحوش غير نصيبك ما بتحوش " بالمرة بالمرة فش ايمان، والله انه كل شي قسمة ونصيب، بعرف انه القراء بيتحمسوا اسا وراح يقولولي تعليم وتعلمتي وانت حلوة واصبري وما بعرف شو ...المشكلة مش فيي أنا ، المشكله بالعالم يلي احنا فيه ، كل شي غلط ، بكفي انك بنت وبهالعمر وقال شو كمان مش مخطوبة !! وطبعا مجتمعنا العربي ما بيقصرأبدا بأنه يمنحك لقب " بايرة " أما شو كلمة بتخلي أي بنت تنبسط غصب عنها
يمكن هالكلمات يكونوا جوات كتير من البنات، رسالتي للمجتمع و لهلبنات بالأول انه أهم شي ما ينقص ايمانكم ، ما تنهزوا من مجتمع بدوا يكتب على سطور حياتكم كلمات بالمرة ما الها علاقه بالدين والايمان بالقضاء والقدر والقسمة والنصيب
ما في أكرم من الله ، ما بعتقد أنه الناس أكرم ولا أحسن ولا أعلم منه شو المنيح وشو يلي مو منيح لكل انسان أو انسانة ...صح ولا أنا غلطانة يا قراء ؟