اخبار محلية | ‏صرخة سليم محمود عبد الرازق الشاب الأبوسناني القلق على بلده، شاهدوا الفيديو

الاحد 19.05.2024

اخبار

الرئيسية >> اخبار محلية

(اضف تعقيب)

‏صرخة سليم محمود عبد الرازق الشاب الأبوسناني القلق على بلده، شاهدوا الفيديو

2014-11-21 09:26:07

ارسل الطالب سليم محمود عبد الرازق من ابو قرية ابو سنان والذي يدرس في ثانويتها ، لموقع المدار ، رسالة مؤثرة حول الاحداث الاخيرة المؤسفة في قريته الغالية ابو سنان ، دعا فيها الشباب الى "التعقل والتسامح والمحبة بين طوائف بلده التي كانت وستبقى مثالا لعلاقات حسن الجوار والمحبة والوحدة والتآخي بين جميع افرادها وعائلاتها وطوائفها "، شاكرا كل اهل الخير الذين ساهموا ويساهمون في الصلح والاصلاح من داخل ابو سنان وخارجها ، داعيا الى المحبة والتعاضد والألفة والتسامح بين الشباب .

"ابو سنان دايما ودوما راح تكون رمز للسلام والاخوة والمحبة"

وقال الطالب سليم محمود عبد الرازق في رسالته المصورة بلهجة بسيطة قريبة من القلوب "انا سليم عبد الرازق من قرية ابو سنان عمري 18 سنة بدرس بثانوية ابو سنان بالوسط الدرزي ، احنا اخر فترة واجهنا مشكلة كبيرة بين الطائفتين الدرزية والاسلامية وصارت اشتباكات عنيفة ومصابين من الطرفين ، والحمدلله المصابين بالف خير وان شاء لله هالمشكلة بتنحل باقرب وقت لانو ابو سنان دايما ودوما راح تكون رمز للسلام والاخوة والمحبة والتقارب بين الناس ومهما وصلت لفووق بضل في ربنا الي بأمره قادر عكل اشي ، ولا باي ديانة من الديانات امرت بالمشاكل ولا القتل ولا الاعتداءات من اي طائفة ولا التعدي حتى لو بالكلام على اي رسول من الرسل" .

واضاف "احنا كوننا الشباب مسؤولين عن هاد الوضع الشباب هني سبب بصلاح الشباب ، بتمنى هالرسالة توصل لشبابنا والشباب من بلاد تانية حتى لما بدهن يفكروا باي خطوة من هالمشاكل يفكروا بطريقة منطقية وبنظرة للمستقبل لانو بفكرش اي واحد فينا برضى انو ولادو يتعايشوا بوضع متل هالوضع وانو كل واحد ينظر عالتاني بنظرة العنصرية !".

"بتمنى ترجع المي لمجاريها"

واردف قائلا :" قد ما كانت الشباب ومشاكلها كبيرة راح يضل الدين والحب والسلام اكبر من كل هاد ببلدنا وبباقي البلاد ، وبتمنى كل اشي ينحل وان شالله بترجع المي لمجاريها. اذا اكم من شب فكروا وارادوا انو يخربوا بين الطوائف لازم نحطلهم حد وما نشجعهم بقول هالحكي للكبار بالذات لانو مش سهلة ابدا انو شبابنا تتورط بهيك مشاكل يعني في طلاب بتبحث عمجالات علمية وبكرا انا بدي التقي مع ابن ديني وغير ابن ديني كيف انا بدي اتعايش مع هاد الوضع ! ".

وقال ايضا "بتأمل وبدعي لرب العالمين انو تكون غيمة سودا وتزول عن قريتي وعن جميع القرى وخلص يعني احنا صار لازم نتصرف بوعي لانو اذا منتصرفش بوعي احنا راح نضل نتراجع ومش راح نتقدم !! ".

وتابع قائلا :"الله يخلي شباب جميع الطوائف ويديمهن على محبة وان شاء الله كل شب يفكر بهالحكي ويساهم بدعم ههالحكي لانو بالاخر الشباب هني سبب بصلاح المجتمع والشباب !. وان شاء الله ما بكون الا كل خير وبتقوم البلد والبلاد اخرى على محبة وسعادة وسلام !".

وختم بالقول "انا بحب اوجه الشكر لكل اهالي الخير والصلح والاصلاح من ابو سنان وخارجها، واعتز فيهن وبكل سعيهم من اجل الصلح في بلدنا وبتأمل وبتمنى انو ابو سنان وغير ابو سنان ترجع بلد وحدة وايد وحدة وقلب واحد وان شاء الله اهلها ما بجتمعوا الا بالافراح والمناسبات الطيبة وشكرا".

المقالات المنشورة تعبر عن رأي كاتبها فقط، وموقع المدار بفسح المجال أمام الكاتب لطرح افكاره االتي كتبت بقلمه ويقدم للجميع مساحة حرة للتعبير

تعليق فيسبوك

تعليقك على الموضوع