باسل عرايدة يكتب قصيدة لحبيب الروح
2009-08-27 12:11:23

اعزفني قصيدة يا نغم مجروح وودي حنيني لحبيب الروح
اشلحني عا غيمة بهالسما بتدور وشتي شوق عالزنبق المشلوح
ازرعني على شباكها منتور من لهفتو بعطر المحبة يفوح
اكتبني حكاية عالشفق بسطور تلمع باسرار العشق وتبوح


ارسمني كحل عا جفنها المسحور وبليل عينيها عا مهلك سوح
اسجني بهوى اشواقها عصفور يرقص وهوي من الالم مدبوح

احرقني على فستانها بخور يجوب الودايا ويعتلي عا سفوح
نسمة احملني تا خدودا زور وعربش على خيالا اذا مسموح

وفلفش حرير بشعرها المنثور وغل بعراوي بلوزها المفتوح
وعا رخامها الانعم من البللور المش قادر يخبي عطش مفضوح



وبستانها وكرومها وزهور والعنبر العاشفافها ممسوح
تاتصير تغلي عاطفة وشعور وتشدني بلهفة وشوق وجموح

ونسكر عا خمرة حبنا المعصور من دموعنا بضو القمر عا سطوح
شو تنهدت معنا بفرح وسرور وشو تحسست فينا الم مكبوح

ووقت الرحيل بحسرة المقهور توقف بمنديل الوداع تلوح
والايد ترجف والقلب محرور وبصوت غص بشهقتو ومبحوح

تنده لا تتركني بقفص مهجور يبكي على غيابك قهر وينوح
خدني معك لو خلف سبع بحور وتصرخ دخيلك من قلب مقروح

عمري بدونك ظلمة الديجور لا بحسبو ولا من الوقت مطروح
انت بعيوني والقلب محفور والناس شافوا صورتك بوضوح

انت الهوا والمي انت النور انت ملاك من السما ممنوح
بعرف بانك عالسفر مجبور وعالهجر متلي معذب ومجروح

لكن بشرع الحب مش معذور ما تطفي جمر أشواقي
بشي ألف بوسة من قبل ما تروح

المقالات المنشورة تعبر عن رأي كاتبها فقط، وموقع المدار بفسح المجال أمام الكاتب لطرح افكاره االتي كتبت بقلمه ويقدم للجميع مساحة حرة للتعبير
الاسم الكامل :
مكان الاقامة :
التعليق :
هام جدا : أدارة الموقع لا تنشر اي تعقيب فيه تجاوز لقانون القذف والتشهير, وتقع المسؤلية على كاتب التعقيب
Copyright © almadar.co.il 2010-2019 | All Rights Reserved © جميع الحقوق محفوظة لموقع المدار الاول في الشمال
سيجما سبيس بناء مواقع انترنت
X أغلق
X أغلق