زجل          ضِحكِة النُّوّار  بقلم:اسماء طنوس المكر

       يا اشجار ياللّا تمَتَّعي مع ضِحكِةِ النُّوّار

                                   نَوَّر عليكِ هَالحلى من بسمِةِ ازهـارِك

      فَتَّح بهالبسمات وجهِـك مِثِل كَأنُّــه نــهار

                                  ضوَّى جمالِك عالدِّني وغَنّتلِكِ اطيارِك

     ضِحكِت عيونُ اللّوز من سِحرِ هَالأزرار

                                  بَدلِة عروس ملَفلَفِـــه وعُقــدِه عَزِنّـارِك

    رِقَّه ودلال بهـــالحـلــى غَمَـــرها لَمّــا زار

                                  رَقْصَت لها الِخصور عَزْفَتـلا أوتــارِك

     غَنّت بلابل عالشّجر وعَسطوحنــا في الدّار

                                  نــادَت بـِـلَحــنِ جــديــد أجــوكِ زُوّارِك

    غصون الدّوالي تعَربَشَت تَتشوف ياللّي صار

                                  شافِت جنايِن عَطّرِت ياللّــي لَفوا ديارِك  

     لَوَّحِــت من فرحتــا وقالِت شو حِـلِوهَالنــهار

                                  اليوم عِرسِك يا  دِني وجينا لِكِ نشـارِك