ادب وشعر | يا إمي خبيني....بقلم: عبور درويش | موقع المدار الاول في الشمال

السبت 11.05.2024

اخبار

الرئيسية >> ادب وشعر

(اضف تعقيب)

يا إمي خبيني....بقلم: عبور درويش

2014-07-13 12:52:05

يا إمي خبيني...

يا إمي خبيني

أنا بردان بعبايتك غطّيني

يا ريت أنام وتغفى عيني

خايف أغمض

خايف يمّا.. رصاصه تُخرق جبيني

يا أمي رُدّي علي ..

يامو.. بنادي.. بصرخ..

ما بتسمعيني..

أنا عطشان وحياتك إسقيني

دموعي نشفت من عيني..

شو صار يا أمي.. ذكريني

ليش عبايتك مبلله..؟؟

ليش نمتي وتركتيني..؟؟

يمّا شُفت دبابه..

شُفتها بعيني

هدمت بيت جارنا ..

وفجّرت دار عمتي أمينه

يا يمّا طلبت منك تخبّيني ..

عتمه وتراب ونار ودخّان..

وروايح..غريبه..

مش ريحتك يا أمي..

ريحتك بعرفها ..

ريحتك مثل الحبق والياسميني

رُدّي علي..

أنا إبنك ما عرفتيني؟؟

يا يمّا إذا ضايقتك سامحيني

أبوس إيدك تسامحيني

يا إمي إيدك بارده..

أصبعك..

أصبعك.. ممدود كأنو بدّك توبخيني..

يمّا دخيلك ..عاتبيني.. زعليني

مش مُهم بس لا تتركيني

أنا خايف..

بحُضنك حُطّيني..

داعبي شعري..

لامسي خدّي..

غنّيلي...

يا حنونه صوتك بهدّيني

يا رب تطلع الشمس ..

وتصحي يا أمي ..

تفتحي عيونك وتلاقيني

وتعرفي أني ناطرك تضُمّيني....

وتترضّي علي قبل ما أنزل

وألعب مع صحابي بالجنينه.....

المقالات المنشورة تعبر عن رأي كاتبها فقط، وموقع المدار بفسح المجال أمام الكاتب لطرح افكاره االتي كتبت بقلمه ويقدم للجميع مساحة حرة للتعبير

تعليق فيسبوك

تعليقك على الموضوع