عالهواره الهواره    يا خساره مية خساره
الدنيا بتمشي لقدام   واحنا منمشي لورا 

لا تقولي عنّي منحوس  وعقلي من راسي طاير
اومختل واو مهووس   وراسي من الدوخه داير
وضعي منهار وميؤوس  حوالي داير داير
لا بينفع جاه ولا فلوس  ومش عم بعرف شو صاير
ولا في عبره ولا في دروس واحنا عالغلط انكابر
لا بوقوف ولا بجلوس ولا بالبيت ولا بحاره
            وعالهواره  الهواره  

الربيع العربي يا صحاب ولا بصيفه ولا بخريفه
ملفوف غيوم وضباب صعب نفسر تعريفه 
البعاد والقراب عم يسعوا لتحريفه
لا في حل ولا جواب المستقبل مش حنشوفه
وانغلقت كل الابواب وكل مين يعمل عا كيفه
وكل واحد عنده اسباب عم يستنى الاشاره
           وعالهواره الهواره  

بلاد الدجله والفرات مهد الحضاره مهزوم
حلّت في ارضها النكبات شي مجهول وشي معلوم
تجمعت كل اللعنات يا حسره ويا مية الف شوم
تكالبوا كل الجهات اعداء المدنيه دوم
قسموها كنتونات شيعي وسنه وكردي وروم
والعربان والغربان عاثوا بارضها بجهاره
            وعاهوار الهواره

سرقوا الثوره المصريه من اصحابها الاصليين
والاحزاب الوطنيه من ادباء وفنانين
وال همه الوحدويه والضحايا المنسيين
يا مصر العربيه وين اهلك والمنفيين
والثوره العرابيه عم بتنادي عالملايين
وينك يا زغلو ل السعد ترد لمصر العباره
        وعالهواره الهواره

ثورة تونس والياسمين عم يبكي على حاله
بو عزيزي هالمسكين ضحى بروحه وبعياله
تا خلصنا من العابدين بن علي وكل رجاله
الاخوه والسلفيين نيال شعبه نياله
الديمقراطيه تخمين راح تتحقق كرماله
لا كفاله ولا تامين كل العالم محتاره
           والهواره الهواره

وسوريا الامويه شعبك دايما بالمرصاد
ما بيرضى العبوديه وما بيستسلم للجلاد
مهما تصول الغّربيه مش راح تركع للاوغاد
اسلام ومسيحيه سنّي وعلوي مع اكراد
وحده وحده شعبيه مهما الظالم بطشه زاد
حريه وعلمانيه وماعاد بدها شطاره
       وعاهواره الهواره