قالوا العمر ينعد بسنينه                   مش بالهوا والحب وحنينه
كل ما طوى صفحه من كتابه           مسكين ختير ربنا يعينه

وان مرق عا درب الهوى مشوار      وكحّل عيونه وفرفك جبينه
قالوا شو صابوا اختل عقله وطار      ضيّع طريقه وطلع عن دينه

وان لبس ثوب مفرفح بهالعيد           ومسحه عطر بالعب حاسدينه
يتهامسوا ويتغامزوا من بعيد            شو هالجريمه الكل صالبينه

قلتلّهم يا بشر حاجه عاد                 مش بالسنين العمر بنزينه
العمر احساس وشعور بنعاد            ويحلا مع الايام تلحينه
 
العمر ترتيله عشق عالبال              وكاس وطرب عالجسم لابسينه
العمر زغروده غزل تنقال             من شفاف شهد وعسل جابلينه

العمر مرجوحة امل يا ناس          ودمعة فرح بالعين ساكبينه
مهما غزا شيب الشعر بالراس      ال قلبه شباب الشيب ما يلينه