مافي مرتاح وراضي              الكل ملبّك مش فاضي              

شي مد يون وشي مرهون         والمصروف صار زياده                    

كلّه مشغول بحاله                 بيخلق مقته لعياله

وكل ما عنّت عباله              الضحكه بيشحدها شحاده ا

العنده سيّاره بالدين             يتمنّى يصيروا تنتين

عنتر مش حامل قرشين      والغيره صارت عاده

داره ان كانت ملعب خيل      والعمله بجيابه هيل

يا ويله جاره يا ويل            ان شبع اللقمه بزياده

قدام العالم زعيم               لو ما في بجيبه ملّيم

لا هو بسلوكه سليم          ولا بالحي ولا بنادي

ويا نعمك عالسياسه       كلّها شك ووسواسه

راسا" بدّه الراّسه         بعنقه يعلّقها قلاده

النّخوه والهمّه بعاره        تتنقّط بالقطاره

والكذب صاير شطاره      وعا وجهه الفشل بادي

كلّه من كثر التفكير       بيتخبط من غيرتدبير

بيوقّع حاله بالبير        ان ما في عنده اراده

ما عاد قيمه للانسان     ما بدها حجه وبرهان

سقى الله ايام زمان      ويعود الحادي ينادي         

دبّّر امرك واتعقّل       وحاسب لا تكون مغفّل

وعالخالق بس توكّل     والقناعه عبدها عباده

ارضى بعيشتك تتهنّى    لكن اطمح واتمنّى

وعا غيرك لا تتجنّى     ولا تنصّب حالك قاضي

بتقضّي عمرك مرتاح    لا تتعدّىولا تجتاح

الاخلاق بجنبك سلاح     ترد الصاعين وزيادة