يا مين يسمعني ويعطيني الجواب    شو اللي جرى لبلادنا من بهدله  

كل البلاد احتلت وحل الخراب       مش بس نحنا جابهتنا المشكله

ومن بعد طول سنين من قسوه وعذاب   وقتل ودماروهدم وفكره قاتله 

في بلادنا اللي العدل فيها غاب      صرنا عبيد بارضناالمسالمه

اليابان صارت مزرعه وارضها خراب  اسال هروشيما انهدمت كامله 

والمانيا اللي اتهدمت والعز غاب    صارت من العشر الدول الفاعله

باريس مع روما تاريخها شاب     حتى استفاقت بانتفاضه شامله

شو اللي جعلنا لهالوقت غياب      تايهين عا درب الحياةالسالمه

واتقسمت اوطاننا وحام الغراب   باطلالنا والياس حاله شاغله

وما عاد فينا نشتكي والامل داب  وما حدا فاهم ليه الدنيا ظالمه

قعدنا على رصيف الحياه اغراب  نستنا رحمة ربنا ومش نازله

المشكله فينا وما بدها حساب     بيكفي بقى تقسيم وفكره ما يله

هذا مسيحي وهذا كردي الكل ساب  سني وشيعي والعداوه ماثله

حاجه بقى قيس ويمن وشك وعتاب ورايات مليانه بمعاني زايله

هذا السبب كل السبب وعنا الجواب نشبك ايدينا مع اراده عاليه

الله عطانا ارض مليانه وهضاب بترول مع فوسفات عنا مشايله

لازم نصونها من العدا صبح غياب وننعم بخيرها اليوم بهمه عاليه

شدّوا السواعد يا عرب وعدّوا الركاب الايام دهمتنا ومشاهد مؤلمه

وان ما لحقنا ننبعث ونصبح احباب  لنصير للتاريخ اكبر مهزله