ألقيت القصيدتين في الأمسية الزجلية التي أقيمت في حرفيش يوم الجمعة الموافق 2011/4/1  

سبحان رب العرش هالخالق الاكوان

                                               ابدع جمال الدني زيّن معانيها

خلّى بعزمو السما ارتفعت بلا عمدان

                                           ونجوم مثل الذهب بالليل تضويها

وجبال ما اتزحزحت عَ مدة الازمان

                                           وينبوع ماء الصفا يجري بواديها

انظر مروج الخضر أََََنضر من المرجان

                                               والزهر فتّح ندى جنّه بما فيها

وَشْوَشْ نسيم الصبا بهمسة الوديان

                                            مالوا الزنابق على حفة نواصيها

والطير علاّ وسرح رفرف بهالجنحان

                                                عَ مد عين الفلا طار بأعاليها

والبحر موجو طما فوق الصخر تعبان

                                              لرمال بعد الظما كاسات يسقيها

وليلات وقت الحلك اسود من القطران

                                          يظهر بكبدا البدر يضوي نواحيها

والغيم غَيْثو هما يروي قلب عطشان

                                          وتكثر علينا النعم والارض يرويها

وجنات بر وبحر في خدمة الانسان

                                         ومروج ورد وزهر فاح العطر فيها

وخيرات ما بتنحصى في كل وقت وان

                                               نيال يللي حصى نعمات باريها

الإبنة ختام هزيمه

مثل الليل ان يومي اسوَدْ

                                النور بليلي بتخَلّي

ومثل الصخر ان دَهري اشتَدْ

                               الصبر بروحي بتمَلّي

مثل السور ان قلبي هَدْ

                               علَيّ الحنيّه ادّلي

ومثل السيف ان حرفك حَدْ

                                قلبي رح يبقى سلّه

ما بعمرو رح يحمل حقد

                             وْرَح يحرَس عندو اضّلّي

كرمال الزهر الْ عَلْخَدْ

                             عن قلبي لا تتخلّي

انت لْروحي مثل السَدْ

                            عالي وعمرك ما تكلّي

عني الموجه تْردي رَدْ

                             ترجع هيّ ومنذَلّه

انت عندي مثل الورد

                            جنّة ايامي تحَلّي

يا خيتي ما مثلك حَدْ

                          انت ياسمين وفلّ

كل ما تخلق شمس الغد

                            بتخلق بعيونك طلّه

ومهما يكون في جزر ومَدْ

                             بنبقى فنجان ودلّه