قصيدة زجل من الشاعر داهش مشلب يهديها لزوار الموقع الكرام... استخلصوا العبرة من هذه القصيدة...
شــــحّـــاد
كنــت مرّة علــى درب الـمدينـــة --------------------- ماشــي بعـــتم والدنيـــا سكيْـنة
شــفت شحّـــاد جنب الحيط حاني --------------------- وجنــب منو شفت طفلة حزينـة
ســألــتــوا ليش هالطفلة المصانة --------------------- عمبتبــْـكي مثــل طفـــلة سجيـنة
قـــلـــّي الـــجوع يا خـيي أنـانـــي --------------------- أخــذ منـها دمع عمري وسنيني
والله مـــــا تركــــت بنتـي جـعاني ---------------------- لو بقــدر بطعميـــها حـــنينـــي
قـــلتـــلوا يا خيــي بهالمـَـــعانـــي ---------------------- ما رح بتـجيـب للطفلـة طحينــة
اذا بتــتـــرك خزينــة مش مـلانـي ---------------------- ما رح تملى مصاري هالخزينة
وهـيــكي أنت رح تبـــقى مـُـعانــي --------------------- اذا ضليْــت لنفـــسك رهـــيـــنة
ورحت من بعد ما حكيتو وحكانـي ---------------------- ومْرقـوا شهور عَشْمالي ويميني
لقيتــــوا بعدهــــا وهـُــوّي لقانـــي ---------------------- وقــلـّي كانت كنـــوزي دفيـــنة
وقـــــلي صرت في أرفـــع مكانـة ----------------------- ورح بصــفـّي سبع جوا عريني
قـلـتـلـوا الكرامـــــة والــرزانــــــة ---------------------- ما بســـووا مــال بيملّي سفيــنة
قــلـّـي من بعـــــد قـســــوة زماني ---------------------- عمـــرو ما رح بيوطــا جــبيـني
وبنــتـــي اليــــوم همـّي الأولانــي ---------------------- ما بتركـــها لـــجوهرتي الثميـنة
وقــلــّي بْحَمِـد الله ألـّـي كـَفــانــــي ---------------------- لــــيل نهــــار عمبسجــُــــد لالله
الــّي خلــّــصني مـــن الشــــحدة المهينـــة